Ախալցխայում՝ Ռաբաթի բերդի տարածքում, անցկացվել են Վրաստանի Անկախության օրվան նվիրված տոնական միջոցառումներ՝ համախմբելով բազմաթիվ այցելուների և քաղաքի բնակիչների։
Տոնակատարությունների շրջանակում բերդի վերին հատվածում ներկայացվել է ռազմական տեխնիկայի ցուցադրություն, իսկ ներքին տարածքում կազմակերպվել է տեղացի ձեռնարկատերերի և արհեստավորների կողմից պատրաստված ձեռագործ աշխատանքների ցուցահանդես-վաճառք։ Միջոցառումը հնարավորություն է տվել այցելուներին ծանոթանալ տեղական արտադրանքին, մշակութային նախաձեռնություններին և տոնական մթնոլորտում մասնակցել Անկախության օրվան նվիրված միջոցառումներին։
Տոնական միջոցառումների շրջանակում անցկացվել է նաև համերգային ծրագիր՝ երգի և պարի կատարումներով։ Համերգին մասնակցել են տեղական և հրավիրված ստեղծագործական խմբեր՝ տոնական տրամադրություն պարգևելով ներկաներին և հարստացնելով միջոցառման մշակութային մասը։
Ախալցխայում Անկախության օրվան նվիրված տոնակատարությունը կազմակերպվել է ենթակառուցվածքների նախարարության կողմից։