Վրաստանի վարչապետ Իրակլի Կոբախիձեն հանդիպել է Վրաստանում ՄԱԿ-ի մշտական համակարգողի Դիդիե Ցոգբիուկի հետ։ Այս մասին տեղեկատվություն է տարածել կառավարության աշխատակազմը։
Նրանց խոսքով՝ հանդիպման ժամանակ քննարկվել են 5-ամյա շրջանակային համաձայնագիրը, Վրաստանի կառավարության և ՄԱԿ-ի գործակալությունների միջև համագործակցությունը, ինչպես նաև Վրաստանի օկուպացված տարածքներում մարդու իրավունքների պաշտպանության և մարդասիրական ասպեկտների առումով ստեղծված իրավիճակը։
«Ուշադրություն դարձվեց ՄԱԿ-ի Կայուն զարգացման համագործակցության 2026-2030 թվականների շրջանակի իրականացման գործում համատեղ ջանքերի կարևորությանը։ Նշվեց, որ հնգամյա շրջանակային համաձայնագիրը, մի կողմից, հիմնված է ազգային առաջնահերթությունների վրա, իսկ մյուս կողմից՝ արտացոլում է ՄԱԿ-ի Կայուն զարգացման նպատակները։
Հանդիպման ընթացքում ընդգծվեց Վրաստանի կառավարության և Միավորված ազգերի կազմակերպության գործակալությունների միջև երկարամյա արդյունավետ համագործակցությունը, որը նպաստեց երկրի ինստիտուցիոնալ կարողությունների ամրապնդմանը և հետևողական բարեփոխումների իրականացմանը։
Կողմերը քննարկեցին Վրաստանի օկուպացված տարածքներում ստեղծված իրավիճակը՝ մարդու իրավունքների պաշտպանության և մարդասիրական ասպեկտների առումով։ Նշվեց ՄԱԿ-ի կարևոր դերը հակամարտությունից տուժած բնակչության իրավունքների պաշտպանության գործում», — ասվում է հայտարարության մեջ։