Ինդոնեզիայի նախագահ Ջոկո Վիդոդոն հայտարարել է, որ Ռուսաստանի և Չինաստանի նախագահներ Վլադիմիր Պուտինը և Սի Ծինփինը ծրագրում են մասնակցել Բալիում նախատեսված G20 գագաթնաժողովին։ Այդ մասին քաղաքական գործիչը խոսել է Bloomberg-ի հետ հարցազրույցում։
G20-ի գագաթնաժողովը տեղի կունենա Բալիում նոյեմբերի 15-16-ը։ Մի շարք արևմտյան երկրներ, այդ թվում՝ ԱՄՆ-ն և Կանադան, առաջարկել էին Ռուսաստանին բացառել G20-ից։ Սակայն գագաթնաժողովին մասնակցող մյուս երկրները չեն աջակցել այդ նախաձեռնությանը։
Ավելի վաղ Ռուսաստանում Ինդոնեզիայի դեսպան Խոսե Տավարեսը վստահեցրել էր, որ իր երկրի իշխանությունը G20-ի գագաթնաժողովում ապահովելու է Պուտինի լիարժեք անվտանգությունն ու հուսալի պաշտպանությունը։
Դեսպանը հայտարարել է նաև, որ Ջակարտան պատրաստ է գագաթնաժողովում կազմակերպելու Ռուսաստանի և ԱՄՆ նախագահների հանդիպումը: