Իսրայելը զենքի խոշոր արտահանող է, բայց նրա զինված ուժերը մեծապես կախված են ներմուծվող ինքնաթիռներից, կառավարվող ռումբերից և հրթիռներից: Փորձագետները Գազայում ՑԱՀԱԼ-ի գործողությունը համարում են նորագույն պատմության ամենաինտենսիվ և կործանարար օդային արշավներից մեկը՝ գրում է BBC-ն:
Իսրայելի որոշ արևմտյան դաշնակիցներ ավելի հաճախ են կոչ անում դադարեցնել զենքի վաճառքն Իսրայելին՝ Գազայի հատվածում ՀԱՄԱՍ-ի դեմ պատերազմի վարման պատճառով: Նրանք պատճառաբանում են, որ Իսրայելը բավարար քայլեր չի ձեռնարկում խաղաղ բնակչության կյանքը պաշտպանելու և նրանց բավարար մարդասիրական օգնություն տրամադրելու համար:
Անցյալ ուրբաթ ՄԱԿ-ի Մարդու իրավունքների խորհուրդը պաշտպանեց զենքի արգելքը. 28 երկիր կողմ քվեարկեց, վեցը՝ դեմ, 13-ը ձեռնպահ մնաց: ԱՄՆ-ը և Գերմանիան, որոնք Իսրայելին ամենաշատ զենք մատակարարող երկրներն են, դեմ քվեարկեցին, իսկ Գերմանիայի ներկայացուցիչը երկրի դիրքորոշումը բացատրեց նրանով, որ բանաձևն ուղղակիորեն չի դատապարտում ՀԱՄԱՍ-ին: