Ֆրանսիան և Մեծ Բրիտանիան առաջարկում են Ռուսաստանի և Ուկրաինայի միջև հրադադար հաստատել մեկ ամսով, իսկ դրա համար այդ ընթացքում պետք է հրաժարվել օդային և ծովային հարվածներից ու էներգետիկ ենթակառուցվածքների վրա հարձակումներից։ Le Figaro թերթի հետ հարցազրույցի ժամանակ ասել է Ֆրանսիայի նախագահ Էմանուել Մակրոնը:
Ֆրանսիայի ղեկավարը նաև ընդունել է, որ դժվար է լինելու ստուգել՝ արդյոք հրադադարը ռազմաճակատում պահպանվում է, թե՝ ոչ, քանի որ ճակատային գծի երկարությունը հավասար է Փարիզից Բուդապեշտ հեռավորությանը։
Ֆրանս-բրիտանական առաջարկի համաձայն՝ եվրոպական ցամաքային զորքերն Ուկրաինա կմտնեն միայն երկրորդ փուլում։ «Առաջիկա շաբաթներին ուկրաինական հողում եվրոպական զորքեր չեն լինի»,- Մակրոնի խոսքը մեջբերել է Լe Figaro-ն: Ըստ Ֆրանսիայի նախագահի՝ բանակցությունները կարող են տևել շաբաթներ, իսկ խաղաղապահ զորախումբը կարող է տեղակայվել խաղաղության համաձայնագրի ստորագրումից հետո: Խոսելով Մակրոնի ծրագրի մասին՝ Ուկրաինայի նախագահը հայտարարել է, որ ինքը «տեղյակ է ամեն ինչից»։
Մակրոնը նշել է նաև, որ իր երկիրը և եվրոպական մյուս պետությունները պաշտպանության համար պետք է ծախսեն համախառն ներքին արդյունքի 3-3,5 տոկոսը։ Եվրահանձնաժողովը պետք է ավելի ստեղծագործաբար մոտենա պաշտպանական ծախսերի ֆինանսավորման հարցին, հավելել է նախագահը։