Սամցխե-Ջավախքի նահանգապետի առաջին տեղակալ Գիորգի Քոչիաշվիլին նահանգապետի աշխատակազմում աշխատանքային հանդիպում է անցկացրել մունիցիպալիտետների ղեկավարների հետ։
Հանդիպման ընթացքում քննարկվել են Տարածաշրջանային նախագծերի հիմնադրամի ֆինանսավորմամբ իրականացվող ենթակառուցվածքային աշխատանքների ընթացքը, ինչպես նաև ընթացիկ նախագծերի ժամանակին, արդյունավետ և բարձր որակով իրականացմանն առնչվող հարցերը։
Օրակարգում ընդգրկված էր նաև «Տաո» ռեգբիի ակումբի գործունեության հաշվետվությունը։ Ներկայացվել են վերջին վեց ամիսների ընթացքում իրականացված աշխատանքները, ինչպես նաև քննարկվել են ակումբի առաջիկա ծրագրերն ու զարգացման հեռանկարները։
Առանձնահատուկ ուշադրություն է դարձվել տարածաշրջանում ռեգբիի ենթակառուցվածքների զարգացմանը, մասնավորապես՝ նոր ռեգբիի մարզադաշտերի կառուցման և մարզաձևի մասսայականացման ուղղությամբ նախատեսվող նախաձեռնություններին։
Աշխատանքային հանդիպմանը մասնակցել են նաև Սամցխե-Ջավախքի նահանգապետի տեղակալ Սերգի Մուշկուդիանին, նահանգապետի աշխատակազմի ղեկավար Վախթանգ Մերաբիշվիլին, տեղական ինքնակառավարման հետ կապերի ծառայության ղեկավար Սաբա Սամսոնիձեն, տարածաշրջանային նախագծերի համակարգման ծառայության ղեկավարի տեղակալ Վախթանգ Գելաձեն, Վրաստանի ռեգբիի միության ներկայացուցիչ Գայոզ Մոնիավան և Քաղաքային զարգացման հիմնադրամի ներկայացուցիչ Գիորգի Խուցիշվիլին։