Թբիլիսիում ԱՄՆ դեսպանատունը սխալ է անվանել վրացական հետախուզության հայտարարությունը, թե ԱՄՆ Միջազգային զարգացման գործակալությունը ֆինանսավորել է դասընթացները՝ երկրում զանգվածային անկարգություններ կազմակերպելու նպատակով։
Վրաստանի պետական անվտանգության ծառայությունը (ՊԱԾ) երկուշաբթի հայտնել է, որ Սերբիայի երեք քաղաքացի սեպտեմբերի 25-ին ԱՄՆ ՄԶԳ հրավերով ժամանել են հանրապետություն և դասընթացներ են անցկացրել հասարակական կազմակերպությունների ու քաղաքացիական ակտիվիստների մասնակցությամբ, որոնք պետք է մասնակցեին երկրում իշխանության տապալմանը բռնի միջոցներով: Սերբիայի քաղաքացիները, որոնք ներկայացնում են Canvas կազմակերպությունը և հարցաքննվել են Պետական անվտանգության ծառայության կողմից, արդեն լքել են Վրաստանը։ Հետախուզական ծառայության տվյալներով՝ դասընթացները ֆինանսավորել է USAID-ը։ Վրաստանի ղեկավարությունը կազմակերպությունից պարզաբանումներ է պահանջել հետախուզական ծառայությունների հետաքննության հետ կապված։
«Այսօր մեր կողմից աջակցություն ստացող նախագծերից մեկի դեմ ներկայացված մեղադրանքները սխալ են և էապես խեղաթյուրում են Վրաստանին մեր օգնության նպատակները: USAID-ն աջակցում է Վրաստանի ժողովրդին 1992 թվականից: Ինչպես միշտ, այս օգնությունը թափանցիկ է, և մենք ողջունում ենք կառավարության ցանկացած մտահոգություն քննարկելու հնարավորությունը»,- ասված է դեսպանատան հաղորդագրության մեջ։
Ամերիկյան դիվանագիտական առաքելությունը նշել է, որ ԱՄՆ ՄԶԳ-ն ավելի քան երկու տարի համագործակցում է Canvas-ի հետ՝ «օգնելու մարդկանց բարձրաձայնել իրենց ընտանիքների և համայնքների համար կարևոր խնդիրները»: Դեսպանատունը հավելել է, որ Canvas-ի մասնակցությամբ դասընթացներ են անցկացվել «մանկական քաղցկեղի բուժման բարելավում պահանջող մայրերի և այն մարդկանց համար, որոնք փաստաբանական ծառայություններ են մատուցում տարեց քաղաքացիների իրավունքների մասով»:
Վրաստանի ՊԱԾ տվյալներով էլ՝ նախատեսվում է հանրապետությունում անկարգություններ կազմակերպել՝ ուժով իշխանությունը տապալելու նպատակով։ Դրա համար կազմակերպիչները մտադիր են ներգրավել Ուկրաինայում կռվող վրացիներին, ինչպես նաև վրացի երիտասարդներին, որոնց ուսուցումն իրականացնում է Canvas կազմակերպությունը լեհ-ուկրաինական սահմանի մոտ։
Վրաստանում ԱՄՆ դեսպանատունը հերքել է անկարգությունների նախապատրաստման ֆինանսավորման մասին տեղեկությունը
