Ղազախստանի կառավարությունը հրամանագիր է հրապարակել տարբեր կատեգորիաների ներգաղթյալների համար երկրում մնալու կանոնները խստացնելու մասին։ Դրանք ներառում են նաև ռուս վերաբնակիչներին՝ մարդիկ, որոնք լքել են Ռուսաստանի Դաշնությունը 2022 թվականի ընթացքում տարբեր (հիմնականում՝ քաղաքական) պատճառներով, գրում է Коммерсантъ-ը:
Հաշվի առնելով այն հանգամանքը, որ Ռուսաստանը ԵԱՏՄ անդամ է, նրա քաղաքացիներին թույլատրվում է առանց կացության թույլտվություն ստանալու Ղազախստանում մնալ ոչ թե 30 օր, ինչպես բոլորը, այլ երեք անգամ ավելի երկար, բայց նոր կարևոր նախազգուշացմամբ՝ «ընդհանուր 90 օրացուցային օր՝ յուրաքանչյուր 180 օրվա ընթացքում»։
Դեկտեմբերի վերջին Ղազախստանի ներքին գործերի նախարարությունը նշել է, որ 2022 թվականին երկիր է մուտք գործել 5,6 միլիոն օտարերկրացի, որից 2,9 միլիոնը՝ ռուսներ։
Նախքան Ռուսաստանում սեպտեմբերին մասնակի զորահավաքի հայտարարումը՝ ռուսաստանցիների օրական միջին մուտքը Ղազախստան կազմել է 8-9 հազար մարդ, իսկ զորահավաքի գագաթնակետին այն հասել է 30 հազարի։
Ըստ Коммерсантъ-ի՝ Հայաստանը կարելի է համարել ռուսաստանցի վերաբնակիչներին ողջունող երկրի օրինակ։ Դեկտեմբերի 26-ին էկոնոմիկայի նախարար Վահան Քերոբյանը հայտարարել էր, որ Երևանը «պետք է ամեն ինչ անի, որպեսզի վերաբնակները հնարավորինս երկար մնան Հայաստանում»։
Հենց ռուսների հոսքի հետ է նա կապում տնտեսության աննախադեպ աճը՝ տարեվերջին 13-14 տոկոս։
Ղազախստանի քաղաքական գործիչների կարծիքով՝ երկրի կառավարության որոշումը թելադրված է տարբեր նկատառումներով: Իրավապաշտպան Եվգենի Ժովտիսը, օրինակ՝ որոշումը կապում է «սոցիալական լարվածության» վախի հետ։ «Ղազախստանն ի սկզբանե վախենում էր վերաբնակիչների հոսքից, քանի որ նրա համար, ի տարբերություն Հայաստանի, քաղաքական թերություններն ակնհայտորեն գերազանցում են տնտեսական առավելությունները։ Կա նաև հյուսիսային շրջանների գործոնը, այն բնակեցված է հիմնականում ռուսներով, որոնք դիտում են ռուսական հեռուստաալիքներ և համակրում են Մոսկվային։ Զորահավաքի հայտարարությունից հետո սկսեցին Ղազախստան գալ նաև մարդիկ, որոնք շատ չեն հարգում մեր երկրի ինքնիշխանությունը»,- ասել է իրավապաշտպանը։